相比愛對頭， 結果正襯頭

【文／羅肇錦∕國立中央大學客家語文暨社會科學學系榮譽教授】

 

　　日常生活裡肚，輒常會拿別個事同物，來同身邊事物做比較，係講用忒潦草忒執性个方式做事个人，一無注意就會搣毋著，差到天仔隔五里，分人感覺你這个人做事毋對頭，比論毋襯頭。較嚴重个還會分人罵「狗漯火囪」「豬哥搭狗膦」，故所相比愛「對頭」，結果正會「襯頭」。下背拿近期曾彩金先生主導出版个《六堆辭典》做例仔來講這个道理。

　　憑良心講，從徐運德先生主導个《客話辭典》，到楊政男、徐清明、龔萬灶、宋聰正主編个《客語字音詞典》，一直到曾彩金先生這本《六堆詞典》。三本就全係取材本地本土客話做原料，去剪裁編修出來个「客話」詞典，毋係「客家話」辭典。𠊎會恁仔講， 係因為四縣客話係原鄉梅州帶來台灣，混雜學老話所變成个「客話」，但係目前一般人講个客家話（包含目前教育部、客委會編个詞書），係國民政府來台，正攞攞合合轉變出來个客話，這兜加入當多國語詞彙个客話，正安到「客家話」。從這種客話到客家話變化个立場來看，《六堆詞典》到2020年正出版，還做得保存「客話」本色，吂變「客家話」， 又過難得个係蒐集个六堆地區詞彙比苗栗个《客話辭典》還較豐富還較有客味。

　　比將「過」這隻字，苗栗《客話辭典》當用心收著兼四十隻詞彙，大家就好偷暢了，無想著《六堆詞典》收集著六十零隻常用詞，像過電、過嘴、過再、過坨、過頭、過手、過水、過贏、過潦、過家、過火、過慘、過篼豬、過分人……，現下客家人當多毋會講个詞彙，《六堆詞典》就還當完整个保留下來。再以「過手」這隻詞來講，一般辭典淨收「轉手」个意思，但《六堆詞典》除忒「轉手」以外，還收「得逞、到手」个義項，還舉例講「毋好恁戆猴，儘採就分人騙過手。」親像這兜例仔，當簡單就做得表現六堆詞典比其他詞典還較深入收集當地非常客家特色个詞彙，留分後代客家人，做盡有價值个參考。

　　毋過，《六堆辭典》為著保存佢六堆个特色，在同音字編排順序个方法，為了配合一般人熟悉个國語陰陽上去（ ˊˇˋ），將第一第二第三第四聲个調類順序，定成「富夫符府」，這種排法同「客話本色」个立場，堵堵相反。愛保留自家个主體性，無愛分後期官話國語影響，就愛用「夫符府富」（ˊˇˋ ） 个順序正合四縣話聲調个歷史平上去入个順序。當然早期學堂漢學先生教个「夫府富福符府富服」（ˊ ˋ ˋ ˇˋ ）又係另種聲調順序。本成採用哪種順序就做得，無人敢講麼人正著，𠊎在這位，係站在四縣「客話本色」个立場來看，就毋好麼个就以普通話（國語）為標準去定自家个規則，也就係當多人講个：「四縣客話第一聲就係國語第二聲，四縣話第二聲就係國語第三聲，第三聲就係國語第四聲，第四聲就係國語第一聲。」這係非常毋科學个「狗漯火囪」，希望客家朋友莫更過恁衰過正好。

　　當然，客話也無需要麼个就愛以學老話（閩南語）做標準，去寫自家个漢字。像有兜客家地區，明明客話有正確个「米篩目」好用，挑挑毋用，顛倒用學老人寫毋著个「米苔目」， 明明客話有正確个「糊糊纏」好用，挑挑毋用，顛倒用學老人寫毋著个「勾勾纏」，這就係「相比愛對頭，結果正襯頭」。
　　
羅肇錦教授 聲檔 — 相比愛對頭， 結果正襯頭 （四縣腔）





　

▲BACK